叱吒903

我係收音機迷
細細個已經夜媽媽靜靜雞聽露芙
大個左之後變本加厲
搭車聽
上堂聽
沖涼聽
訓覺聽
一日廿四小時
曾經可以由朝早9點不停聽
聽到凌晨兩三點
以下係我理想中既903節目表

9-12 在晴朗的一天出發
12-2 五天精華遊
2-4 山寨王
4-6 萬世巨星
6-8 空中喱民
8-10 不明來歷
11-1 森美移動
1-3 嘩嘩嘩打到黎

之後應該係時間休息訓覺
記得沙士個陣
日日係屋企都係903陪住我
個D卒卒15秒既歌真係洗晒腦
仲有山寨王入面既特備節目"E座心情"
係有對住淘大E座既情侶
打去講佢地睇電視先知樓下有飯派
日日用益力多樽玩1:99
仲有勁愛呀成既erica日日FAX去節目
仲有佢地玩既夾夾甲
森美移動既派出所量產型
呢D都係我對903最好最開心既回憶
早兩年903大裁員
聽到喪DO男Leo喊
沖緊涼既我都忍唔住流眼淚
仲有呀郁
見到佢地一個一個離開
個陣真心嬲左商台

眼見而家903既節目質素每況愈下
節目愈轉愈差
而家真係揀節目黎聽
真希望903可以搞返好
我等你!

對紋身的看法

紋身
代表那人很勇敢
勇於面對痛楚
勇於面對它一輩子



我爸爸有一個紋身
我記得我小時候會用手指指它摸它
再問爸爸點解有隻蝴蝶係你隻手?
我忘了爸爸答我什麼
總之隻蝴蝶成日都有肥皂
因為爸爸沖涼成日都留左少少係上面
反正我就覺得紋身就像穿耳窿一樣
做了就不能後悔
紋身前應該要深思熟慮
因為沒有後悔的機會


反觀其他事情
其實所以事都是
做了就不能後悔的
發生左就發生左
就像紋身一樣
刻在你人生的史書中
你每做一件事
都會影響自己或其他人
你每一個決定
都會令愛你的人關注起來



不要沒原因去做任性的事

十件最憎的事

1:多人既地方
一去到多人既地方
我就會好"文"
好想離開個到
好想殺晒個D人

2:一時一樣既人
有D人決定左又改決定左又改
我覺得決定前狂諗
諗一世都可以
但係決定左就唔應該改囉
最憎人晒我時間

3:除左人之外會行會走會郁既生物
其實我成日都講呢句
D人問我"狗你都驚?"
其實真係除左人之外我嘜都驚

4:對事/物唔清晰
我會好想知今日既行程
大約做D咩有咩人去咩地方

5:遲到既人
身邊太多會遲到遲得好緊要既人
少則一兩個鐘
大則三四個鐘都夠膽死
搞到我都開始會遲到
因為知道佢會遲
我都唔洗咁準時

6:猥瑣既男人
個d眼神
個d動靜
真係又覺得佢地賤
又淆晒底
都唔知佢地係咪未見過女人

7:唔聽電話既人
你個電話唔聽
就不如唔好開啦
最好取消埋佢
整返個CALL台算啦
打十萬次都唔聽
真係火都黎埋

8:冇禮貌冇文化冇公德心唔自重既人
打尖嘴妙妙黑面明見有需要既人都唔讓坐等等
全部都好討厭
我都唔知佢地讀書個陣學嘜架

9:懶叻既人
識少少扮代表
你知唔知全世界都笑緊你呀!
重扮博士!

10:講大話既人
我真係唔知點解有d人講大話講到好小事都要講
人地問你有冇兄弟姊妹都要講大話
唔覺得好無聊架咩
點解唔可以交個心出黎做朋友呢?
唔係人人都想你死架

中學生應否談戀愛

係人都可以談戀愛
但年紀太小就唔好啦
心智未成熟搞出人命就不得了
從前看到這題目會不明大人點解唔俾中學生談戀愛
而家人大左會覺得佢地唔係針對中學生
係佢地覺得"那人"夠成熟談戀愛未
談戀愛涉及照顧其他人
與人相處之道
好可以幫助佢地成長
唔好可以令佢後悔一世
小時候
想愛就愛
愛得沒有包袱
中學時的戀愛很真實
大家都無憂無慮
無論個陣時愛成點
起碼人地問你中學個陣既野
你唔會淨係話讀書讀書同讀書呀
人大了
心境和需要都變了
人際關係又錯綜複雜
猜疑妒忌陰謀論等等都浮晒面
慶幸我身邊都是簡單的人
如果認為自己同你愛既人都心智夠成熟
中學生係可以談戀愛既
但係記得要安全囉~

友誼，來了又走遠

看到題目
腦海即時現出H小姐和V小姐的樣子
但我不想提她們
我說的是不再有朋友感覺的人
不是一輩子不可能做朋友的人
這是一位和我同年同月同日生的朋友
我們的家人都住在同一條村
我媽媽和她媽媽住隔離床位
她比我早幾小時到這個世界
我叫呀怡
她叫呀兒
上幼稚園時我們是很好很好的朋友
我們會交換食物
上堂一齊傾計傾到俾老師罰
放學一齊行返屋企
我們小一都係同班同學
但小二的時候她要搬家了
搬到當時還陌生的油麻地
還記得她搬前的一星期
我們在村內的遊樂場
周圍影相談天說地
我記得我當時是很捨不得她的
她是我第一位好朋友
開始時我們都有書信聯絡
會在生日時互相寄生日咭的
又會寄聖誕咭
但你知啦
我3分鐘熱度架嗎
好快我們就失去了聯絡
近年facebook又好像把我們拉近了一點
我們生日的時候都會在對方的wallpost祝福大家
但感覺好像很行貨
可能人長大了
已經有各自的生活
怎樣努力也不可能像從前一樣


真希望她當年沒有搬走
她沒有搬走
我們可能會一起讀中學
做一對青梅竹馬的好朋友

珍惜妳所擁有

HKY
五人中只有你有真正獨立的機會
你在外國的日子要好好珍惜
學會照顧自己
學習自己解決問題
你有一個口是心非的媽媽
我真心知道她很愛你
你也很愛她
閒時給她一個擁抱
她會很開心

LPH
五人中只有你是獨女
你的家人都很寵愛你
他們不許廿一歲的你夜歸就是証明
你的藝術天份最高
你可以隨心畫出你想畫的
雖然你經常扮傻
但大家都會不以為然去保護你
直到我們火花擦出

LNY
你有一個除了天上的星星飯
什麼都會給你的爸爸
你會閒時一家人遊車河
和細佬打架
五人中你最爽快
不做作
又最懂享受一個人
我也受你的影響
五人中我最愛就是你
我清楚你的火爆
我樂意去遷就你
大家都會尊重你的
因為你是大佬

LWH
你很會照顧別人
和你一起感覺很好
你會為我們火起時降溫
你可以照顧你的哥哥
你廚藝應該是我們中最好的
但請不要再什麼都焗
很熱氣的
你有可愛的媽媽
她會因為我講英文而驚慌失措
你有一位有型的爸爸
他的背影真的不得了


ASY HKY LPH LNY LWH
我們都有自己的思考方式
大家都樂於接受意見
愛朋友愛家人
大家都有惻隱之心
我們會為彼此擔心和開心
我們是真正的朋友
我們擁有最好朋友
我們最幸福

不可改變我那壞習慣

壞習慣
早前既BLOG已經提過
曾聽說同一個動作連續做二十日就會變成習慣
我認為習慣是一種行為
每一個週期就做同樣的事
例如每日都要睇新聞
每星期打一次BLOG
每個月M到前都想開火
不論好壞都是習慣
但每個人對"壞"一字都有不同見解


我的壞習慣

1. 每次用完既野都放晒係枱
張枱亂到我自己都冇坐過係到用
貪方便到極點
成日覺得D野第二日會用所以唔放返好

2. 每晚訓覺都唔熄收音機
明知自己將會訓著
都唔肯熄收音機
浪費資源!! 要戒!!

3. 每次都未聽晒人地講我就開口
改緊架啦~
再係咁開會個陣就會亂晒
同埋愈來愈自私自我自以為是

4. 返學遲到
無論返9點定點半
例牌遲上一兩個鐘
但係我接受唔到開會遲到
我覺得咁係不負責任
返學我對自己負責
但係開會係對大家負責

5. 有巴士唔搭搭小巴
明知小巴貴好多
但係死都要搭小巴
因為我最鐘意既交通公具係地鐵的士小巴

6. 每件事都諗唔好個面先
為左令自己唔好咁失望
我通常都會將所以事既負面諗到好大
咁樣到最後件事真係負面我都有心理準備
如果係正面既咁就萬分驚喜



應該仲有好多我自己唔知既壞習慣
請朋友們以悄悄話告訴我
我想了解自己更多

如果可以再來一次

如果可以再來一次

我會好好上數學堂
唔會而家連分數都唔識
負數又唔曉

我會俾心機學好英文
而家做project會快得多

我會一早就同佢分手
唔應該奢望佢會為我浪子回頭

我唔會叫何SIR去死
太沒禮貌
直頭冇用腦!!
作為一個人都唔應該講咁既野
何SIR對唔住

我唔會睇佢SMS
搞到自己唔開心左咁多個月
唔知為嘜

我唔會係小六個年剪短晒D頭髮
呢個我真心後悔...

我都會和他拍拖
因為我們都開心過

我都會同佢做朋友
好彩我幾個月就睇清楚佢
令我細細個就知道人性醜陋既一面

我都會發展呢個錯覺
因為佢令我更清楚自己想要嘜野

我都會選擇這所中學
因為我開心認識到你們

正能量

我的正能量來源

1.晚上跟好友們開party
　這是一個小小城市論壇，學業愛情時事電視劇都會是topic
2.一再發現潘同學的白痴行為
　跌左枝筆，汁返個陣跌左份notes，汁返份notes，又再跌筆
3.和baby的無聊對話sms
　變態，所以我地係朋友，唔係朋友，咁係咩，你根本就係我 呀po，nana!!
4.網上討論區的ching回應
　網民：有性病呀 你唔医番好个臭西，將來冇人同你奶西，揾人小你个西都難！
　樓主：係呀..我唔止有臭西仲有臭腳添呀...痴線
http://www.discuss.com.hk/viewthread.php?tid=11915948&extra=page%3D2&page=2
5.跟獎門人玩webcam sam li test 發現自己是個很善良的人
　最水火不容的星座：雙子座
　最佳益友星座：獅子座
　最有默契的星座：山羊座
　我係白羊座既最佳損友星座XP
6.晚飯全都是自己喜歡的餸菜
　咖哩雞，冬瓜湯，菜心
7.發現獎門人仲有個多月就回歸
　世界盃都開始啦!!
8.身無分文的我在淘寶逛一天
　睇下都開心
9.曼聯贏波!!
　唔多解釋
10.自我day off
　歡樂派對

正能量前傳

這是讓人先放下負能量

放鬆心情的文章





遇到壞人

不要發嬲自責

不要覺得自己遇人不淑

可以換個角度覺得自己經歷到別人沒有的

人都是從錯誤中學習的

我們要以史為鑑



發生不幸不如意的事

不要問點解

不要逃避

事情已經發生就改變不了

其實可以選擇積極面對

勇於面對問題和承擔責任的人最可愛



如果突然感到人迷失了

不要令自己陷入崩潰

因為你的朋友們一定會支持你

無論你有什麼決定

你就是你

我們就喜歡你





學習把負能量轉換

苦中作樂

抱持樂觀的態度

偶爾讓自己放縱三分鐘

之後又重新上路

"哈哈笑過苦日子"



男說: 我呀媽頭先問我係咪好多日冇訓

女說: 哈哈~ 佢梗係見到你對眼好黑

男說: 佢話我老左好多

OMG

我想像中的伊甸園 --- 死後的世界

我都唔知點解我會出個咁既題...


人死後去的不一定是伊甸園
但我知我不會落地獄
雖然我壞事做盡
但未至於要落地獄

伊甸園
會有阿當夏娃
不再是樹葉
他們會穿上家庭服
一人抱住一個小朋友
在門口迎賓
他們會為我戴上鮮花
給我一個愛的抱抱

伊甸園
周圍都鋪滿鮮花
一大遍草地
有很多動物
牠們都是友善的
能與人溝通的
有不同的人種
大家都用同一種語言
我會見到我的爺爺嫲嫲
侯賽恩忽必烈同埋希特拉

伊甸園
每一個人都平等
每一個人都很自由
但人仍然會有唔開心
因為要經歷唔開心才知什麼是開心




原來過得很快樂
只我一人未發覺

如果只得一星期

如果真的已經走到這一步
一: 世界要末日 自私的地球人要一齊接受這個結果
二: 是我不幸身患惡疾 將要獨自離開我愛和愛我的所有人
第一件事我會去買價值二十蚊的巨無霸餐
這會是我第一次亦係最後一次
我會做未試過去未到過的地方
例如 坐電單車飛上大帽山
睇日出
遊船河
宿營
去米埔南生圍
上電視
我每晚都會返屋企食飯
攬住爸爸媽媽同埋家姐一齊訓
我記得我地試過一次
已經是二十年前的事了
那天是爺爺的回魂夜XD
如果是因為二而只得一星期
西式喪禮
禮堂鋪滿茉莉花
要播我和朋友們在聖士提反狂跑的片段
在我家玩close the door的片段
我希望我的喪禮大家都會笑
笑到停不了






那天很愛笑

我確曾用心愛過的一位

為了他:-

我花了4年青春
明知他有外遇都啞忍
自己強忍淚水

我會放棄工作
時間都被他fully occupy
不會有超過24小時不見面

我努力學整他想吃的
例如: 蝦餃 餃子 出前一丁 等等
因為我知我沒有和他一起過生日的可能
我一針一針為他縫製一個布蛋糕
盡管我知他會於生日當天和他的"澳洲女友"在家慶生
我送的生日禮物會被"澳洲女友"蹂躪

我會對我的好友撒謊
說我幸福得很

他生病了
因為唔清楚他病後的喜好
我會飛出旺角買粥同魚片河
再飛入沙田餵藥

從前的我於睡夢中被吵醒會發脾氣
但我被他三日唔埋兩日就半夜三更打黎話掛住我而變好了

我會放100蚊和一張窩心便利貼到他的銀包
因為我知他需要這些鼓勵

他會買好多好多出奇蛋俾我
因為我喜歡驚喜

他會送我想要的東西
例如: NDS 電話

他會陪我睇星星行海傍
特登出SOHO食晚飯再入赤柱行沙灘
陪我做盡浪漫的事



最後
他會對我講盡所有謊言
說盡令我傷心的說話
搬出一切白痴的理由去掩飾他的惡行
而我
亦發現自己都唔係咁愛佢
我知道是我們的愛情變了
我的心態變了
是時候放手了
我不喜歡拖拖拉拉
我明白長痛不如短痛
我明白沒有沒有誰活不下去的事
最後用了半年時間完全康復
進度理想



如今我成熟了
人亦變得理智了
做事理智
愛亦理智
近日發現愛不可加入理智
有理智的愛不是愛
有理智的愛不會長久
沒有理智的愛可以承受的比想像中多
沒有理智的愛會發現自己可以為對方做得更多



嚴以律己 寬以待人
己所不欲 勿施於人